Make tusok tusok the fishballs and sawsaw the isaw!

Maarte ako sa pagkain.

Hindi ako basta-basta kumakain lalo na't hate ko yung nakahain. Hindi din ako kumakain sa kung saan-saang lugar dahil maarte nga ako!

Hindi ako kumakain ng okra, gabi, spaghetti na may red sauce, laing, at iba pang mga gulay na di ko type!

Hindi din ako kumakain sa mga karinderya sa Kamaynilaan at sa mga street food stalls na makikita sa tabi tabi lang. Takot ko lang na magka Hepa!

ISAWAN SA UP


Pero mayroong isang lugar na namimiss ko na kainan, ito ay ang isawan sa UP Diliman. Dito lang kasi ako kumakain ng fishballs, isaw, kwek kwek, at kikiam.

Simula pa noong ako ay estudyante, dinarayo namin lagi ng aking mga orgmates ang mga isawan at fishballan sa iba't ibang parte ng campus partikular ang nasa Vinzons, Law at Ilang-Ilang. Pero ang pinakapaborito namin ay ang nasa Ilang. (Nilipat na ito sa bakanteng lote na tapat ng Law Center at Arcade ilang taon na din ang nakakalipas. Di ko lang alam kung andun pa din ito dahil mahigit isang taon na ata ako di nakakapunta sa UP para kumain ng isaw)

Sobrang sarap kasi nung isaw sa may Ilang. Sa katunayan, kahit nagtatrabaho na ako, madalas ko pa din itong balikan lalo na't kung nagkikita kami ng aking mga kaibigan. Kapag may inuman naman, ang mga Atenista at UPian kong officemates ay nag-oorder pa ng isaw kina manong para gawing pulutan.

Sadyang miss ko na talaga kumain ng fishballs at isaw sa UP.

Sana, sa pag-uwi ko ng Metro Manila, may sumama sa akin na tumambay sa isawan sa UP para naman matikman ko muli ang masarap na isaw at fishballs na sobrang namimiss ko na!

(Kasalukuyang naglalaway habang sinusulat ang blog na ito)

PAGKAING KALYE SA CEBU

Kung may isang bagay ako na natutunan sa pananatili sa Cebu, ito ay ang pagkain sa mga karinderya.

Nang ako ay dumating sa Queen City of the South, nagulat ako sa dami ng mga karinderya at barbecuehan na makikita dito.

At dahil hindi naman ako marunong magluto, kinailangan ko laging kumain sa labas. Mahirap naman na lagi na lang ako magfastfood dahil hindi yun healthy kaya napilitan ako kumain sa mga karinderya. Natuto ako kumain ng nakakamay. At syempre, natikman ko ang masasarap na pagkain sa Cebu. Masarap pala ang pagkain sa mga karinderya dito at mura pa. Kaya't kung kapos na ako sa budget, ang mga karinderya, tapsilogan at mga barbecuehan ang aking takbuhan.

Kung sa Kamaynilaan ay paborito ko ang isawan sa UP, sa Cebu naman ay paborito ko ang sikat na Larsian na matatagpuan malapit sa Fuente Osmena. Sa tuwing magtutungo ako sa lugar na ito ay siguradong bundat na bundat ako pag-uwi. Dito lang kasi ako lumalamon ng todo todo! Kaya kong kumain ng 10 siomai, 4 na belly (liempo), 3 chorizo, 8 sticks of tinae (isaw), 2 sticks of baticolon, 2 sticks of chicken liver at mula 8-10 na puso (kanin)! Lamon galore talaga!

Sa tuwing babalik ako ng Cebu at uuwi naman ng Kamaynilaan, ito ang una at huli kong kinakainan. Ilang kaibigan na din na taga Metro Manila ang nadala ko dito at lahat sila ay nag-aagree na masarap ang pagkain sa Larsian.

Kaya't kung magtutungo kayo ng Cebu, wag kalimutang bisitahin ang Larsian sa Fuente. Mausok pero sulit ang pagkain!

(Kasalukuyang nag-iisip kung kelan ulit magtutungo ng Larsian para lumamon)